Владата остро демантира дека постои цензура или каква било произволна измена на текст на песна, со политичка позадина, во однос на вчерашната изведба на „А бре, Македонче“, химна на партизанското движење во Македонија, која потекнува од периодот на НОБ за време на Втората светска војна.
-На настанот е користен автентичен аранжман чија хармонизација е правена од Драган Шуплевски, потврдена од Национална опера и балет и Сојуз на композитори. Хармонизација на аранжманот според нашите сознанија е правен во доцните седумдесетти односно рани осумдесетти, велат од Владата за „Локално“.
Од таму во прилог ја приложија и партитурата која е користена за изведбата на вчерашниот настан.
Песната „А бре Македонче“ е напишана од Крсте Црвенковски и Коле Чашуле, а Ордан Михајлоски – Оцка ја компонираше.
Вчера во Куманово пред Спомен костурницата на централната прослава на 11-ти октомври, хорот наместо „клетите фашисти“ го испеа стихот „душманите клети“. Дел од медиумите блиски до опозицијата, ова го оценија како скандал.
Н.П.