Постапката за признавање странски дипломи и образовни квалификации од утре, 4 ноември, ќе се реализира само по електронски пат, објави Министерството за образование и наука (МОН).
Барањата за нострификација/еквиваленција на образовни квалификации стекнати надвор од Македонија, заедно со сите неопходни документи согласно со правните прописи, како и електронско плаќање, ќе се поднесуваат преку порталот www.e-uslugi.mon.gov.mk.
„Изработениот позадински софтвер овозможува електронско водење и решавање на предметите од страна на комисиите во Министерството за образование и наука и на овој начин значително се крати времето, но и дел од трошоците кои настануваат при користењето на оваа услуга“, велат од МОН.
Оттаму додаваат дека процесот на дигитализација на образованието и на образовните услуги и натаму ќе биде една од приоритетните цели во насока на модернизација и интеграција на националниот образовен систем во европскиот образовен простор. Истовремено од МОН најавуваат дигитализација и на други услуги.