Претседателот на Владата, Димитар Ковачевски, заедно со шефовите на владите од земјите од Западен Балкан, како и високи претставници на владите од земјите на ЕУ и Обединетото Кралство, денеска присуствуваа на официјалното почнување на самитот за Берлинскиот процес.
Пред почетокот на самитот, кој се одржува во Берлин, Сојузна Република Германија, Ковачевски беше пречекан од германскиот канцелар, Олаф Шолц.
Првиот самит за Западен Балкан се одржа исто така во Берлин во 2014 година, а целта на годинешниот самит е да се интензивираат соработката и регионалната поврзаност помеѓу земјите од Западен Балкан.
Лидерите од Западен Балкан заедно со претставниците на владите од земјите од ЕУ, Обединетото Кралство и претставници на Европската комисија, ќе имаат можност да дискутираат за регионалната соработка и заедничките регионални пазари, за енергетската стабилност и трансформацијата, како и за перспективите на Берлинскиот процес и стратешките прашања.