Политичките аналитичари се поделени околу тоа дали македонската опозиција, предводена од ВМРО-ДПМНЕ, го користи отворањето на културни клубови во С. Македонија и Бугарија за популизам и политички маркетинг. Додека едните мислат дека одредени политички партии и центри на моќ, стојат зад отворањето на културни клубови и во Македонија (бугарски политичари), и во Благоевград, со цел печалење на политички поени, други велат дека зад клубовите во Охрид и Битола стои „бугарска стратегија“ за да остварат некакви интереси .
Оливер Ромевски
– Мицкоски ако стои зад клубовите во Битола и Охрид со цел да ја дестабилизира власта, зошто тогаш власта не застане зад клубот во Благоевград-Бугарија. Тоа е оксиморовска теза. значи во една реченица имаме две фактички спротивни тези. Зад клубовите во Охрид и Битола си стои она стандардна Бугарска стратегија, си стојат одредени поединици што сметат дека треба да се отворат тие клубови за да остварат некакви интереси, и тоа до тука е во ред. Не е во ред што власта дозволи да се отварат клубови со имиња на водачи на фашистичкото движење. Тука е грешката кај власта, не е кај Мицкоски, колку и да сакат да му го препишаат него, изјави за „Локално“, Оливер Ромевски -политички аналитичар.
Според политикологот Благојче Атанасоски одредени политички партии и центри на моќ, отворањето на културни клубови и во Македонија, и во Благоевград го злоупотребуваат за печалење на политички поени.
– За жал, одредени политички партии и центри на моќ, отворањето на културни клубови и во Македонија (бугарски политичари), и во Благоевград, наши опозициски лидери ги злоупотребуваат за печалење на политички поени, како крајна цел да дојдат на власт преку инструментализација на тензиите и ужасно нарушените односи меѓу двете земји. Оттука Мицкоски со Апасиев се натпреварува кој ќе го земе приматот на „одбрана на македонските национални интереси“ и преку појавувањето на отворањето на македонскиот културен клуб „Никола Вапцаров“ во соседна Бугарија. Треба само да се следи патот на парите кој ги финансира овие клубови и во Македонија и во Бугарија и ќе се види дека тие одат во насока на дополнително влошување на односите меѓу Македонија и Бугарија, односно за повторен обид за попречување на македонските евроинтеграции преку наново употребување на инструментот вето. Тоа не оди во прилог и на двете држави и општества, но многу повеќе оди на наша штета, изјави Атанасоски за „Локално“.
Исмет Рамадани
Политичкиот аналитичар Исмет Рамадани вели дека лидерот на опозициската ВМРО -ДПМНЕ, Христијан Мицкоски со своите изјави и постапки се повеќе личи на дезориентиран лидер.
– Самиот факт што го дели политичкиот простор со Апасиев го прави девалвиран пред внатрешната и надворешната јавност. Тој мисли дека неговите популистички постапки и со играње на чувствата на граѓаните, државата нема да го започне скрининг процесот. Ако продолжи вака, тој ќе се изолира од меѓународната заедница и тоа ќе донесе проблеми на сопствената партија. Тој мора да разбере, пред да биде предоцна, дека не е време за популистички и деструктивни политики. Регресот за евроинтеграции во овие геополитички промени е опасна и одговорна работа за лидерот на опозицијата кој претендира да доаѓа на влас, изјави Рамадани за „Локално“.
„ВМРО-ДПМНЕ се директно поврзани со бугарските клубови и со Ванчо Михајлов“
Од владејачката СДСМ соопштија дека ВМРО-ДПМНЕ се директно поврзани со бугарските клубови и со Ванчо Михајлов.
– ВМРО-ДПМНЕ е директно поврзана со бугарските клубови отворени во Битола и Охрид, кои носат имиња на контроверзни и провокативни историски личности, го потврдува континуитет на опозициската партија со Ванчо Михајлов и се гордее со него. Самиот Мицкоски го потврди континуитетот на ВМРО-ДПМНЕ во своето делување со Ванчо Михајлов, соработник на Третиот рајх. ВМРО-ДПМНЕ е идеолошки поклоник на луѓе што биле извршители на Третиот Рајх, го слави и велича делото и улогата на Ванчо Михајлов. ВМРО-ДПМНЕ во чест на Михајлов изгради спомен куќа во Штип и постави негова восочна фигура во музеј во Скопје. Припадници на ВМРО-ДПМНЕ учествуваа на отворањето на бураскиот клуб во Битола, а Мицкоски се слика со основачите на бугарскиот клуб во Охрид. ВМРО-ДПМНЕ заглавена во минатото, на граѓаните нема што да им понуди освен изолација и враќање назад, велат од СДСМ.
„СДСМ е партијата која потпиша предавнички договор со Бугарите“
Од опозициската ВМРО-ДПМНЕ во реакцијата на тврдењата на СДСМ велат дека токму социалдемократите се партијата која потпиша предавнички договор со Бугарите, и се смета за побугарска и од најбугарската партија.
– СДС е партијата која потпиша предавнички договор со Бугарите, и се смета за побугарска и од најбугарската партија. Во напорот да бидат поголеми бугари од бугарите нека не заборават ова е 2022 година, и народот гледа се и добро знае и не смее да се потценува. Веќе не проаѓаат трикови со Бугарски летоци како во 90 тите, ама СДС очигледно мисли дека може да манипулира и да се глупира на јавна сценаи тоа да пројде неказнето од народот. Политиките кои донесоа понижување и негација на македонскиот идентитет, јазик и историја се последица на СДС, Заев и Ковачевски, се вели во реакцијата на опозициската ВМРО-ДПМНЕ.
Д.Ј.