Нема основа за отворање на случај против премиерот Димитар Ковачевски за случајот „Броило“, порача претседателката на Државната комисија за спречување на корупцијата (ДКСК), Билјана Ивановска, откако такво нешто побара ВМРО-ДПМНЕ.
„Функционер кога стапува на функција, согласно Законот за спречување на корупција и судир на интереси, треба да го довери управувањето на фирма на друго лице кое не е член на неговото семејство. Во случајов, тој не е ниту сопственик, ниту управител“, вели претседателката на ДКСК, Билјана Ивановска.
Опозициската партија побара од ДКСК да отвори предмет со кој ќе истражи дали премиерот Димитар Ковачевски е вмешан во криминал вреден 26 милиони евра во врска со бизнис за производство на струја.
Од ВМРО-ДПМНЕ, на прес-конференција на почетокот на месецов, изнесоа тврдења „дека фирми основани од премиерот Ковачевски и неговиот кум Горан Паунов злоупотребувале државни тендери вредни 26 милиони евра“.