Украинскиот претседател Володимир Зеленски вети дека Украина ќе го врати анектираниот полуостров Крим од Русија на кој било начин што смета дека е соодветно, нагласувајќи дека Киев нема да се консултира со други земји пред да го стори тоа.
„Крим беше и е Украина“, рече Зеленски за време на Кримската платформа, годишен форум организиран од Киев за да се осигура дека руската насилна анексија на полуостровот и нејзината репресија врз граѓаните што живеат таму ќе останат во центарот на вниманието, јави Радио Слободна Европа (РСЕ).
Водачите на десетици земји и меѓународни организации учествуваа на еднодневниот настан, главно преку видео врска поради тековната руска инвазија.
Зеленски на конференцијата рече дека владеењето на Москва донесе еколошка штета, економски пад, социјална репресија и милитаризам на Крим и во регионот на Црното Море.
Тој ја обвини Русија дека лансирала најмалку 750 различни крстаречки ракети од Крим на териториите контролирани од Киев, уништувајќи стотици цивилни згради, вклучувајќи училишта, станбени згради и болници.
„И затоа повторното воспоставување на контролата на Украина врз Кримскиот Полуостров ќе биде историски антивоен чекор во Европа“, рече Зеленски.
Русија ја презеде контролата врз Крим од Украина во март 2014 година. Крим е од стратешко значење за Москва бидејќи е база на нејзината црноморска флота. Аналитичарите велат дека на Киев ќе му биде тешко да ја врати контролата врз полуостровот, пренесува РСЕ.