САД и нивните сојузници со својата политика на санкции ги рушат економските врски, формирајќи нови точки на раст во другите земји, кои заедно со Русија фактички формираа нова “голема осмица”, истакнал претседателот на Државната дума на Русија, Вјачеслав Володин.
„Рушењето на постоечките економски односи, кои ги спроведува Вашингтон и неговите сојузници, доведува до формирање на нови точки за раст во светот“, напишал Володин на “Телеграм”.
Тој потсетил дека групата од осум земји, кои не учествуваат во војната со санкции, а кои ја сочинуваат Кина, Индија, Русија, Индонезија, Бразил, Мексико, Иран и Турција, според БДП и според паритетот на куповната моќ ја надминуваат за 24,4 проценти старата група на индустриски развиени земји Г7.
Според неговите зборови, во исто време економиите на САД, Јапонија, Германија, Велика Британија, Франција, Италија и Канада и натаму трпат големи потреси, па за првиот квартал во 2022-ра година во САД бил забележан пад на БДП за 1,5 проценти, а инфлацијата достигнала максимум од декември 1981-ва година и изнесува 8,6 проценти.
Володин смета дека САД сами ги направиле условите за Русија и другите земји да формираат нова голема осмица.