Протестите продолжија во неколку градови низ Иран во четвртокот против смртта на млада жена во полициски притвор, објавија државните и социјалните медиуми, a група за човекови права соопшти дека најмалку 83 лица биле убиени во речиси двенеделните демонстрации.
Махса Амини (22) од иранскиот курдски град Сакез, беше уапсенa овој месец во Техеран поради „несоодветна облека“ од полицијата за морал, која го спроведува строгиот кодекс на облекување на Исламската Република за жените.
Нејзината смрт го предизвика првото големо изглегување на опозиција на улиците во Иран откако властите ги задушија протестите против поскапувањето на бензинот во 2019 година.
„Потврдено е дека најмалку 83 лица, вклучително и деца, се убиени во #IranProtests“, објави на Твитер „Иран Човечки права“, група со седиште во Норвешка.
И покрај зголемениот број на жртви и жестоката акција од страна на властите, видеата објавени на Твитер покажаа демонстранти кои повикуваат на пад на свештеничкиот естаблишмент во Техеран, Ком, Рашт, Санандај, Масџед-и-Сулејман и други градови.
Државната телевизија соопшти дека полицијата уапсила голем број „бунтовници“, без да даде бројки.
Групите за права соопштија дека се приведени десетици активисти, студенти и уметници, а Комитетот за заштита на новинарите објави на Твитер дека дознал дека безбедносните сили уапсиле најмалку 28 новинари до 29 септември.
Во меѓувреме, германската министерка за надворешни работи во четвртокот рече дека сака Европската унија да воведе санкции врз Иран по смртта на Амини.
Во Норвешка, неколку лица се обиделе да влезат во иранската амбасада во Осло за време на гневни демонстрации. Полицијата приведе 95 лица, јави јавната телевизија НРК.
Претседателот Ебрахим Раиси рече дека немирите се последниот потег на непријателските западни сили против Иран од неговата исламска револуција во 1979 година.
„Непријателите правеа грешки во пресметките пред исламскиот Иран веќе 43 години, замислувајќи дека Иран е слаба земја со која може да се доминира“, рече Раиси на државната телевизија.