Лигата на шампиони и оваа сезона започна со многу возбудувања, а во првиот ден фаворитите главно ја оправдаа својата улога.
Во дербито на вечерта Пари Сент Жермен го победи Јувентус со 2:1, а херој за „светците“ беше Килијан Мбапе.
Французинот фуриозно го започна натпреварот и постигна прекрасен гол во 5-та минута после асистенција на Нејмар. Дваесет минути подоцна Мбапе зголеми на 2:0. Во вториот дел Јувентус успеа да намали преку Мекени, но не успеа да дојде до бод.
Реал Мадрид рутински стигна до победа на гостувањето кај Селтик со 3:0, иако Бензема излезе од игра поради повреда после триесетина минути. Винисиус, Модриќ и Азар беа стрелци за „кралевите“.
Милан не успеа да стигне до победа против Салцбург и одигра 1:1 на гостувањето во Австрија, а Манчестер Сити беше убедлив против Севиља со 4:0, каде Халанд постигна нови два гола во ЛШ.
Лајпциг беше прегазен на свој терен од Шахтјор со 1:4, а Бенфика беше сигурна против Макаби со 2:0.