По тивкото бдение во катедралата Сент Џајлс во Единбург, на кое присуствуваа кралот Чарлс, неговата сестра Ана и браќата Ендру и Едвард, луѓето уште од ноќта чекале во ред да се збогуваат со кралицата, некои со заспани деца во рацете.
Кралот Чарлс ќе ги обиколи четирите делови на Обединетото Кралство пред погребот на кралицата на 19 септември. Во Северна Ирска, луѓето се собрале на улиците кај замокот Хилсборо, официјалната кралска резиденција, пред неговото пристигнување.
„Дојдовме да ѝ оддадеме почит на кралицата Елизабета бидејќи таа беше фантастична кралица и многу лојална на Северна Ирска и сакавме да бидеме тука за да го поздравиме новиот крал“, рече Хедер Пол, држејќи цвеќе и британско знаме.
Џој Хачинсон рече дека се надева дека Чарлс ќе ја одржи земјата заедно. Тој се возел низ улиците на Хилсборо, а потоа излегол од автомобилот за да се ракува со граѓаните кои извикувале: „Господ да го чува кралот“.
Тој пристигна во Северна Ирска од Шкотска, каде што пеш го следеше ковчегот на кралицата во свечена поворка од замокот Единбург до катедралата на Сент Џајлс, каде што присуствуваше на десетминутното бдение.
Елизабета почина во четвртокот во замокот Балморал во Шкотска на 96-годишна возраст, откако владееше повеќе од седумдесет години.
На Чарлс, кој автоматски стана крал на Обединетото Кралство, во Северна Ирска ќе му се придружи новата премиерка Лиз Трас. Во Белфаст, тој ќе се сретне со високи политичари и верски водачи и ќе присуствува на миса во катедралата Света Ана пред да се врати во Лондон.
„Таа многу ѝ значеше на Северна Ирска. Како што знаете, за жал, ние сме прилично поделена земја, но кралицата отсекогаш беше со нас. Таа никогаш не направи ништо лошо“, рече Џои Мекполин од Драмор.
„Мислам дека луѓе од различни религии ќе ја разберат прекрасната работа што таа ја направи. Навистина се надевам дека сите ќе напредуваме и ќе го поддржиме нашиот крал“, додаде Мекполин.
Ковчегот на кралицата вечерва со авион ќе биде пренесен од Шкотска во Лондон, а потоа во Бакингемската палата. Утре, заедно со голема воена поворка, ќе биде преместен во Вестминстерската сала, најстарата сала на британскиот парламент, каде што ќе биде изложен за јавноста до 19 септември.