Претседателот на Еквадор Гиљермо Ласо најави намалување на цената на горивата по двонеделните протести кои блокираа дел од државата. Цените сепак ќе бидат намалени помалку отколку што бараа илјадниците демонстранти.
„Одлучив да се намали цената на бензинот за 10 центи (долари) по галон (3,78 литри), а цената на дизелот за 10 центи по галон“, нагласи претседателот. Дизелот ќе чини 1,80 долари, а бензинот 2,45 долари. Влијателната асоцијација на домородното население што ги предводеше демонстрациите побара цените на горивото да бидат 1,50 и 2,10 долари. Протестите почнаа на 13 јуни, а во насилствата што избувна за време на демонстрациите загинаа шест лица, а десетици беа повредени.
Главниот град Кито е блокиран од бројни блокади на патиштата. Демонстрантите двапати, во четвртокот и петокот, се обидоа да упаднат во зградата на Националното собрание, но беа спречени од полицијата.