Амбасадата на САД е вложена во унапредување на владеењето на правото во Северна Македонија и ги поддржува напорите на властите и на правосудството за обезбедување транспарентност и отчетност кај институциите и внатре во нив, се наведува во одговорот на Американската амбасада во земјава доставен до телевизија Телма во врска со барањето на јавната обвинителка Вилма Рускоска упатено до странски амбасади и меѓународни организации.
„Се чини дека ова прашање е тековен процес и е прашање за надлежните органи да го решат“,се наведува во одговорот на Амбасадата на САД.
Вилма Русковска, шефицата на Обвинителство за гонење на организиран криминал и корупција (ОЈО ГОКК), вчера ги повика институциите, но и странските амбасади, Делегацијата на Европската Унија, како и европската обвинителка Лаура Ковеси да реагираат по, како што вели, притисокот врз неа и обвинителството од директорот на Управата за финансиска полиција, Арафат Муареми.
Ваквиот повик на Рускоска дојде по брифингот со новинари што го одржа Муареми, а на кој најави дека ќе поднесе кривични пријави против Рускоска и обвинителките Ивана Трајчева и Елизабета Јосифовска, по претресот во просториите на Управата.
По ова, продолжија јавните прозивки и обвинувања меѓу Муареми и Рускоска. Директорот на финансиската полиција ѝ одговори на обвинителката дека одговорност за нејзиното самоволие мора да има.
Претресот во Управата за финансиска полиција беше извршен на 18 јули. Тогаш од Обвинителството за гонење организиран криминал и корупција, со кое раководи Русковска, само кратко потврдија дека вршат претрес и оти станува збор за предмет оформен по пријава од граѓани.